Кинйәбулатова Кәтибә

Киньябулатова Катиба

КИНЙӘБУЛАТОВА Кәтибә Кәрим ҡыҙы [15.9.1920, АСБР‑ҙың Арғаяш кантоны Мәүлит а. (Силәбе өлк. Арғаяш р‑ны) — 17.6.2012, Өфө, тыуған яғында ерләнгән], шағирә. БАССР-ҙың атҡ. мәҙәниәт хеҙм‑ре (1980). Яҙыусылар союзы ағзаһы (1956). К.А.Тимирязев ис. Башҡ. пед. ин‑тын (1944), М.Горький ис. Әҙәбиәт ин‑ты эргәһендәге Юғары әҙәби курстарҙы (Мәскәү, 1962) тамамлаған. 1941 й. алып Силәбе өлк. мәктәптәрендә эшләй; 1953—60 йй. “Әҙәби Башҡортостан” (ҡара: “Ағиҙел”) ж. әҙәби хеҙм‑ре, 1967—75 йй. “Башҡортостан ҡыҙы” ж. баш мөхәррире. “Тәүге сәскәләр” исемле тәүге китабы 1954 й. сыға. Шиғриәтенә нескә лиризм, образдар яңылығы хас. “Йондоҙҙар бейей” (1969), “Әсә һулышы” (1980), “Аҫылташтар илендә” (2000) һ.б. шиғри йыйынтыҡтар авторы. “Төпкөлгә сәйәхәт” (1990) китабына ингән повестарында Б.В. һуғышы йылдарындағы балаларҙың ауыр тормошо һүрәтләнгән. “Айгүзәлдең алтын асҡысы” (1970), “Барыһы ла тыуған еремдә” (1982), “Ысынмы был, әкиәтме?...” (1988) һ.б. шиғри йыйынтыҡтары балалар өсөн яҙылған. Зөлфиә, А.Мицкевич, А.С.Пушкин һ.б. әҫәрҙәрен башҡ. теленә тәржемә иткән. Һ.Дәүләтшина ис. пр. лауреаты (2011). Почёт орд. менән бүләкләнгән (1991). Тыуған ауылындағы мәктәп бинаһына Кәтибә Кинйәбулатоваға арналған мемориаль таҡтаташ ҡуйылған.